અમદાવાદના કાલુપુર વિસ્તારમાં આવેલા સુપ્રસિદ્ધ રેવડી બજારની સિંધી માર્કેટમાં આજે વહેલી સવારે આગ ફાટી નીકળતા સમગ્ર શહેરમાં અફરાતફરીનો માહોલ સર્જાયો હતો. આ ભીષણ આગમાં માર્કેટની 30થી વધુ દુકાનો બળીને ખાખ થઈ ગઈ છે. કપડાંના હોલસેલ વેપાર માટે જાણીતી આ માર્કેટમાં લાગેલી આગને કારણે વેપારીઓને કરોડો રૂપિયાનું આર્થિક નુકસાન વેઠવાનો વારો આવ્યો છે.

ધુમાડાના ગોટેગોટા અને અફરાતફરી

આગ એટલી વિકરાળ હતી કે તેના ધુમાડાના કાળા ગોટેગોટા દૂર-દૂર સુધી જોઈ શકાતા હતા, જેના કારણે સ્થાનિક લોકો અને રાહદારીઓમાં ભયનો માહોલ જોવા મળ્યો હતો. સિંધી માર્કેટમાં મુખ્યત્વે કાપડ અને અન્ય હોઝિયરીની વસ્તુઓની દુકાનો આવેલી હોવાથી આગે જોતજોતામાં રૌદ્ર સ્વરૂપ ધારણ કરી લીધું હતું. આસપાસના કોમ્પ્લેક્સમાં લોકો કુતૂહલવશ ધાબા પર ચઢીને આગના દ્રશ્યો નિહાળતા નજરે પડ્યા હતા.​​​​​​​

ફાયર બ્રિગેડનું મેગા રેસ્ક્યુ ઓપરેશન

ઘટનાની જાણ થતા જ અમદાવાદ ફાયર વિભાગનો કાફલો ઘટનાસ્થળે દોડી આવ્યો હતો.

કાફલો: ફાયર વિભાગની 20થી વધુ ગાડીઓ અને પાણીના ટેન્કરો દ્વારા સતત મારો ચલાવવામાં આવ્યો હતો.

અધિકારીઓની હાજરી: શહેરના ચીફ ફાયર ઓફિસર અને ડેપ્યુટી મ્યુનિસિપલ કમિશનર (ફાયર) વિપુલ ઠક્કર સહિતના ઉચ્ચ અધિકારીઓએ જાતે ઘટનાસ્થળે પહોંચીને ઓપરેશનનું નિરીક્ષણ કર્યું હતું.

જીવના જોખમે કામગીરી: ફાયર બ્રિગેડના જવાનોએ છાપરા ઉપર ચઢીને અને સાંકડી ગલીઓમાં જઈને જીવના જોખમે આગને કાબૂમાં લેવા ભારે જહેમત ઉઠાવી હતી. અંદાજે એક કલાકની મહેનત બાદ બહારના ભાગની આગ શાંત પડી હતી, પરંતુ અંદરની દુકાનોમાં કાપડનો જથ્થો હોવાથી આગ અવારનવાર ભભકી રહી હતી.

કરોડોનું આર્થિક નુકસાન

રેવડી બજારના એક વેપારીના જણાવ્યા અનુસાર, આ આગમાં માત્ર એક જ દુકાનમાં અંદાજે 1.5 કરોડ રૂપિયાનું નુકસાન થયું હોવાનું અનુમાન છે. સમગ્ર માર્કેટની 30 દુકાનોને ધ્યાને લેતા આ આંકડો ઘણો મોટો હોઈ શકે છે. લગ્નસરાની સીઝન પૂર્વે જ માર્કેટમાં નવો સ્ટોક આવ્યો હોવાથી વેપારીઓ આર્થિક રીતે પાયમાલ થઈ ગયા છે.

તપાસનો વિષય

સદનસીબે આ દુર્ઘટનામાં કોઈ જાનહાનિના અહેવાલ નથી, પરંતુ મિલકતને મોટું નુકસાન થયું છે. આગ લાગવાનું સચોટ કારણ હજુ સુધી જાણી શકાયું નથી, પરંતુ શોર્ટ સર્કિટ હોવાની પ્રાથમિક આશંકા સેવાઈ રહી છે. કાલુપુર પોલીસ અને એફએસએલની ટીમ હવે આ મામલે તપાસ કરશે. આ ઘટનાએ ફરી એકવાર જૂના શહેરના ગીચ બજારોમાં ફાયર સેફ્ટીના સાધનો અને સાંકડા રસ્તાઓ અંગે સવાલો ઉભા કર્યા છે.