શેરબજારમાં ઘટાડો ઓછો થવાના કોઈ સંકેત દેખાતા નથી. આજે પણ સેન્સેક્સ ૧૫૮૦ પોઈન્ટ ડાઉન થઇ ૭૪,૪૫૪ના સ્તરે ટ્રેડ થયો હતો જયારે નિફ્ટી ૫૨૭ પોઈન્ટ ડાઉન થઇ ૨૩,૧૧૨ના સ્તરે ટ્રેડ થયો હતો. દરરોજ, બજારમાં રોકાણકારો ભારે નુકસાન સહન કરી રહ્યા છે. ગઈકાલે રોકાણકારોએ આશરે રૂ.6 લાખ કરોડ ગુમાવ્યા હતા, જ્યારે આજે શેરબજારમાં રોકાણકારોએ લગભગ રૂ.9 લાખ કરોડ ગુમાવ્યા હતા. બીએસઈ માર્કેટ કેપિટલાઇઝેશન હવે ઘટીને રૂ.431 લાખ કરોડ થઈ ગયું છે.

બેંક નિફ્ટીમાં પણ 1,300 પોઈન્ટથી વધુનો ઘટાડો જોવા મળ્યો. ટોચના 30 શેરોમાં, 27 શેર ડાઉન ટ્રેડ થઈ રહ્યા હતા, જ્યારે ફક્ત 3 શેરોમાં વધારો જોવા મળી રહ્યો હતો. ટાટા સ્ટીલ, બીઈએલ, ઇન્ડિગો અને એલ એન્ડ ટીના શેરમાં 6 ટકા સુધીનો ઘટાડો જોવા મળ્યો.

ઈરાન દ્વારા બે ઓઈલ ટેન્કર પર હુમલા બાદ, ક્રૂડ ઓઈલના ભાવમાં ભારે ઉછાળો જોવા મળ્યો, જેના કારણે હોર્મુઝ સ્ટ્રેટમાંથી પસાર થતા તેલ પુરવઠામાં સંભવિત વિક્ષેપ પડવાની આશંકા વધી ગઈ. ગુરુવારે, બ્રેન્ટ ક્રૂડ ફ્યુચર્સ 100 ડોલર પ્રતિ બેરલની નજીક પહોંચી ગયા, જેના પછી ભાવ સ્થિર થયા.

ભૂરાજકીય તણાવને કારણે, વૈશ્વિક બજારો પણ દબાણ હેઠળ દેખાયા. એશિયન બજારોમાં, દક્ષિણ કોરિયાનો કોસ્પી, જાપાનનો નિક્કી 225, ચીનનો એસએસઈ કમ્પોઝિટ ઇન્ડેક્સ અને હોંગકોંગનો હેંગ સેંગ ઇન્ડેક્સ બધા નીચા સ્તરે ટ્રેડ કરી રહ્યા હતા. યુએસમાં, ડાઉ જોન્સ ઇન્ડસ્ટ્રિયલ એવરેજ, એસ એન્ડ પી 500 અને નાસ્ડેક કમ્પોઝિટ સૂચકાંકોમાં નોંધપાત્ર ઘટાડો નોંધાયો હતો. ડાઉ જોન્સ 700 પોઈન્ટથી વધુ ઘટીને આ વર્ષે પહેલીવાર 47,000 ના સ્તરથી નીચે બંધ થયો.

વિદેશી સંસ્થાકીય રોકાણકારો એ સ્થાનિક બજારમાં તેમના વેચાણનો દોર ચાલુ રાખ્યો. એક્સચેન્જ ડેટા અનુસાર, એફઆઈઆઈએ ગુરુવારે રૂ.7,049.87 કરોડના શેર વેચ્યા હતા. માર્ચ મહિનામાં અત્યાર સુધીમાં, વિદેશી રોકાણકારોએ કુલ રૂ.39,000 કરોડથી વધુના શેર વેચ્યા છે. રોકાણકારો ફેડરલ રિઝર્વના પોલિસી નિર્ણયની પણ રાહ જોઈ રહ્યા છે, જેની બેઠક 17 માર્ચે યોજાવાની છે.