જાણવા મળતી વિગતો મુજબ, મેટોડા જીઆઇડીસી પોલીસ સ્ટેશન વિસ્તારમાં સોશિયલ મીડિયામાં એક યુવક દ્વારા પિસ્તોલ જેવા દેખાતા હથિયાર સાથેની રીલ ઇન્સ્ટાગ્રામ પર અપલોડ કરવામાં આવી હતી. આ રીલ વાયરલ થતા મેટોડા જીઆઇડીસી પોલીસ સ્ટેશનના પીઆઇ એસ.એચ. શર્માના માર્ગદર્શન હેઠળ પી.એસ.આઇ એન.બી.ઝાલા, હેડ કોન્સ્ટેબલ યોગીરાજસિંહ, કોન્સ્ટેબલ રાજદિપસિંહે ઇન્સ્ટાગ્રામ પર હથિયાર સાથેના ફોટાવાળી પોસ્ટ અપલોડ કરનાર શખસની ટેકનિકલ સોર્સના આધારે તપાસ કરી ઓળખ કરી લીધી હતી.

હથિયાર સાથેની આ રીલ અપલોડ કરનાર શખસપાર્થ રણજીતભાઈ વાગડિયા (ઉ.વ. 20 રહે. ખીરસરા તા. લોધીકા) હોવાનું માલુમ પડ્યું હતું જેથી તેની અટકાયત કરી પોલીસ સ્ટેશન લાવી પૂછતાછ કરી હતી. દોઢ વર્ષ પહેલા આ વીડિયો બનાવ્યો હોવાનું રટણ કર્યું હતું. વીડિયોમાં દેખાતું પિસ્તોલ જેવું હથિયાર ખરેખર લાઇટર હોવાનું માલુમ પડ્યું હતું જેથી પોલીસે આ લાઇટર કબજે કરી કોલેજીયન છાત્ર વિરુદ્ધ આ પ્રકારનો વિડીયો બનાવી સોશિયલ મીડિયામાં મૂકીને શાંતિનો સુલેહનો ભંગ કરવા બદલ ગુનો નોંધી કાયદેસરની કાર્યવાહી કરી હતી.

પોલીસે અપીલ કરી હતી કે, સોશિયલ મીડિયામાં હથિયાર સાથે ફોટો વીડિયો અપલોડ કરવો તે એક ગુનો બને છે. જેથી કોઈએ આ પ્રકારના વિડીયો અપલોડ કરવા નહીં અન્યથા કાયદેસરની કાર્યવાહી કરાશે.