ટીમ ઈન્ડિયાના સ્ટાર બોલર અર્શદીપ સિંહ પર ઈન્ટરનેશનલ ક્રિકેટ કાઉન્સિલ (ICC) દ્વારા દંડ ફટકારવામાં આવ્યો છે. ICCએ તેને દંડ ફટકાર્યો છે. રવિવારે ન્યૂઝીલેન્ડ સામે ભારતની T20 વર્લ્ડ કપ ફાઇનલ દરમિયાન અર્શદીપ અને મિશેલ વચ્ચે ઝઘડો થયો હતો. ICCએ આ ઘટના માટે અર્શદીપ સિંહને ICC આચાર સંહિતાના લેવલ 1 ઉલ્લંઘનનો દોષી ઠેરવ્યો છે.

૧૫% મેચ ફીનો દંડ

ICCએ અર્શદીપ સિંહને તેની મેચ ફીના ૧૫% દંડ ફટકાર્યો છે. અર્શદીપ સિંહ ICC આચાર સંહિતાના કલમ ૨.૯ના ઉલ્લંઘન માટે દોષિત ઠર્યો હતો. આ કલમ આંતરરાષ્ટ્રીય મેચ દરમિયાન અયોગ્ય અથવા ખતરનાક રીતે ખેલાડી તરફ બોલ અથવા ક્રિકેટ સાધનો ફેંકવા સાથે સંબંધિત છે. દંડ ઉપરાંત, અર્શદીપ સિંહને તેના શિસ્તભંગના રેકોર્ડ પર એક ડિમેરિટ પોઈન્ટ પણ મળ્યો છે. છેલ્લા 24 મહિનામાં આ તેનું પહેલું આ પ્રકારનું ઉલ્લંઘન છે.

આ ઘટના ક્યારે બની?

આ ઘટના ન્યુઝીલેન્ડની ઇનિંગની 11મી ઓવરમાં બની હતી. અર્શદીપે બોલ ફિલ્ડિંગ કર્યો અને બેટ્સમેન ડેરિલ મિશેલ તરફ જોરથી ફેંક્યો, જે તેને પેડ પર વાગ્યો. જોકે, ભારતીય બોલરે મેચ રેફરી દ્વારા લાદવામાં આવેલી સજા સ્વીકારી હોવાથી કોઈ ઔપચારિક સુનાવણીની જરૂર નહોતી. ઓવર પછી, ડેરિલ મિશેલ અને અર્શદીપ સિંહ હાથ મિલાવતા જોવા મળ્યા.

લેવલ 1 ના ઉલ્લંઘન માટે શું દંડ છે?

લેવલ 1 ના ઉલ્લંઘનના પરિણામે ખેલાડીને સત્તાવાર ચેતવણીથી લઈને તેની મેચ ફીના મહત્તમ 50 ટકા સુધીનો દંડ થઈ શકે છે. વધુમાં, એક કે બે ડીમેરિટ પોઈન્ટ આપવામાં આવે છે. જો કોઈ ખેલાડી 24 મહિનાના સમયગાળામાં ચાર કે તેથી વધુ ડીમેરિટ પોઈન્ટ એકઠા કરે છે તો તે સસ્પેન્શન પોઈન્ટમાં રૂપાંતરિત થાય છે અને તેના પરિણામે પ્રતિબંધ પણ લાગી શકે છે.