ગુજરાતમાં તોળાઈ રહેલી સ્થાનિક સ્વરાજ્યની ચૂંટણીઓ માટે કોંગ્રેસે હવે આરપારની લડાઈના મૂડમાં આવીને તૈયારીઓ તેજ કરી દીધી છે. ભાજપના ગઢમાં ગાબડું પાડવા માટે કોંગ્રેસે આ વખતે ‘હાઇટેક’ અભિગમ અપનાવ્યો છે. ઉમેદવારોની પસંદગી પ્રક્રિયામાં પારદર્શિતા લાવવા માટે ડિજિટલ પ્લેટફોર્મનો ઉપયોગ અને સંગઠનમાં મોટા ફેરફારો સાથે કોંગ્રેસ મેદાને ઉતરી રહી છે.

11 માર્ચથી ઉમેદવારોની પસંદગીનો પ્રારંભ

ગુજરાત પ્રદેશ કોંગ્રેસ દ્વારા આગામી 11 માર્ચથી 20 માર્ચ દરમિયાન રાજ્યભરના તાલુકા, જિલ્લા અને મહાનગરોમાં ઉમેદવારોની પસંદગી પ્રક્રિયા હાથ ધરવામાં આવશે. આ 10 દિવસીય કાર્યક્રમમાં ચૂંટણી લડવા માંગતા તમામ દાવેદારોને રૂબરૂ સાંભળવામાં આવશે. પ્રદેશ પ્રમુખ અમિત ચાવડાએ સ્પષ્ટ કર્યું છે કે, સ્થાનિક સ્તરે પેનલ તૈયાર કરવામાં આવશે જેથી લાયક અને પાયાના કાર્યકરોને તક મળે.

QR કોડથી અરજી: દેશમાં પ્રથમવાર પ્રયોગ

પરંપરાગત પદ્ધતિને બાજુએ મૂકી કોંગ્રેસે આ વખતે QR કોડ જાહેર કર્યો છે. 15 મહાનગરપાલિકાઓના ઉમેદવારો આ QR કોડ સ્કેન કરીને સીધી ઓનલાઇન અરજી કરી શકશે. આ પદ્ધતિ પાછળનો હેતુ નીચે મુજબ છે:

ડિજિટલ ડેટાબેઝ: તમામ ઉમેદવારોની વિગતો એકસાથે ઉપલબ્ધ રહેશે.

પારદર્શિતા: ભલામણ કે વશીલાવાદને બદલે મેરિટના આધારે પસંદગી.

સરળતા: યુવા અને ટેક-સેવી કાર્યકરો માટે અરજી પ્રક્રિયા વધુ સુલભ બનાવવી.

રાહુલ ગાંધીનું ‘50-50’ ફોર્મ્યુલા: યુવાનો અને મહિલાઓનો દબદબો

કોંગ્રેસના રાષ્ટ્રીય નેતા રાહુલ ગાંધી અને મલ્લિકાર્જુન ખડગેના સીધા આદેશ બાદ ગુજરાત કોંગ્રેસે ટિકિટ ફાળવણીમાં ક્રાંતિકારી નિર્ણય લીધો છે.​​​​​​​

50% યુવા ઉમેદવારો: કુલ બેઠકોમાંથી અડધી બેઠકો પર એવા ઉમેદવારોને મેદાને ઉતારવામાં આવશે જેમની ઉંમર 50 વર્ષથી ઓછી હોય. યુવા કોંગ્રેસ દ્વારા 20 ટકાની માંગણી સામે પક્ષે 50 ટકા હિસ્સો આપીને યુવાશક્તિ પર ભરોસો મૂક્યો છે.

50% મહિલા અનામત: મહિલા સશક્તિકરણના ભાગરૂપે અડધી ટિકિટો મહિલાઓને અપાશે.

સ્થાનિક સ્તરે સ્વાયત્તતા: આ વખતે પસંદગી પ્રક્રિયામાં પ્રદેશ કક્ષાએથી કોઈ દખલગીરી કરવામાં આવશે નહીં. જે-તે વિસ્તારના સ્થાનિક નેતાઓ અને કાર્યકરો જ ઉમેદવાર નક્કી કરશે.

ચૂંટણી પહેલા મેયરના નામની જાહેરાત

સામાન્ય રીતે ચૂંટણી જીત્યા બાદ પક્ષો મેયર કે પ્રમુખ નક્કી કરતા હોય છે, પરંતુ કોંગ્રેસે આ વખતે નવી રણનીતિ અપનાવી છે. જો કોંગ્રેસ સત્તા પર આવશે તો મેયર પદ પર કોણ બેસશે, તેની જાહેરાત મતદાન પહેલા જ કરવામાં આવશે. આનાથી જનતાને ખબર પડશે કે તેઓ કોના નેતૃત્વમાં શહેરનો વિકાસ ઈચ્છે છે.

10,000 થી વધુ બેઠકોનો જંગ

15 મહાનગરપાલિકા- 1044 બેઠકો

34 જિલ્લા પંચાયત- 1084 બેઠકો

262 તાલુકા પંચાયત- 5214 બેઠકો

83 નગરપાલિકા- 2596 બેઠકો

‘વોટ ચોરી’ અને ભ્રષ્ટાચારના મુદ્દે ભાજપને ઘેરવાની તૈયારી

અમિત ચાવડાએ SIR પ્રક્રિયા બાદ સુધારેલી મતદાર યાદી પર સવાલ ઉઠાવતા કહ્યું હતું કે, "ગુજરાતમાં વર્ષોથી બોગસ મતદારોના આધારે ચૂંટણી જીતવામાં આવતી હતી. 70 લાખ જેટલા નામ કમી થયા તે જ સાબિત કરે છે કે અગાઉની યાદીમાં મોટા પાયે ગોટાળા હતા."

કોંગ્રેસ આ વખતે ભાજપના શાસનમાં જોવા મળતા ભ્રષ્ટાચારને મુખ્ય મુદ્દો બનાવશે.

પહેલા વરસાદમાં ધોવાઈ જતા રસ્તા.

ટેસ્ટિંગ દરમિયાન જ તૂટી પડતી પાણીની ટાંકીઓ.

શિક્ષણ, આરોગ્ય અને પીવાના શુદ્ધ પાણીનો અભાવ.

પ્રદૂષણ અને ટ્રાફિકની સમસ્યા.

કોંગ્રેસે ‘લોકોનો મેનિફેસ્ટો’ બનાવવા માટે ઘરે-ઘરે જઈને સૂચનો લીધા છે. પ્રજાના પરસેવાના ટેક્સની લૂંટ અટકાવવા અને પ્રાથમિક સુવિધાઓ આપવાના સંકલ્પ સાથે કોંગ્રેસ આ વખતે ગુજરાતના રાજકારણમાં નવો અધ્યાય લખવા તૈયાર છે.