મે 2025માં ભારત અને પાકિસ્તાન વચ્ચે થયેલા ટૂંકા સંઘર્ષ દરમિયાન ભારતીય વાયુસેનાએ હાથ ધરેલા 'ઓપરેશન સિંદૂર'ની ઘાતક અસર હવે સેટેલાઇટ તસવીરોમાં સ્પષ્ટ દેખાઈ રહી છે. લેટેસ્ટ તસવીરો દર્શાવે છે કે ચકવાલ પાસે આવેલું પાકિસ્તાનનું વ્યૂહાત્મક 'મુરીદ એરબેઝ' (Murid Airbase) હજુ પણ ખંડેર હાલતમાં છે અને પાકિસ્તાન તેના કમાન્ડ એન્ડ કંટ્રોલ સેન્ટરની મરમ્મત કરવામાં સંપૂર્ણપણે નિષ્ફળ રહ્યું છે.

સેટેલાઇટ તસવીરોએ ખોલી પોલ
ફેબ્રુઆરી 2026ની લેટેસ્ટ સેટેલાઇટ ઇમેજનું વિશ્લેષણ કરતા એનાલિસ્ટ ડેમિયન સાયમન જણાવે છે કે, જે કમાન્ડ સેન્ટર પર ભારતે હુમલો કર્યો હતો, તે હવે સંપૂર્ણપણે જમીનદોસ્ત દેખાઈ રહ્યું છે. જૂન 2025માં પાકિસ્તાને નુકસાન છુપાવવા લીલા રંગના તિરપાલનો ઉપયોગ કર્યો હતો અને ડિસેમ્બર 2025માં લાલ તિરપાલ લગાવી મરમ્મતનો ડોળ કર્યો હતો. જોકે, ફેબ્રુઆરી 2026ની તસવીરોમાં ત્યાં માત્ર કાટમાળ અને ખુલ્લી જમીન જોવા મળે છે. હુમલાથી ઇમારતનું અંદરનું માળખું એટલું નબળું પડી ગયું હતું કે તે રિપેર કરવા યોગ્ય રહી નહોતી અને અંતે તેને તોડી પાડવાની ફરજ પડી છે.

રાફેલ અને પેનેટ્રેટર મિસાઈલની ચોકસાઈ
10 મે 2025ના રોજ વહેલી સવારે ભારતીય વાયુસેનાએ પાકિસ્તાનના 10 એરબેઝ પર સચોટ હુમલા કર્યા હતા. મુરીદ એરબેઝ પરના હુમલામાં નીચે મુજબની વિશેષતાઓ જોવા મળી:

પેનેટ્રેટર વોરહેડ્સ: આ હુમલામાં રાફેલ ફાઇટર જેટ દ્વારા એવી મિસાઇલો છોડવામાં આવી હતી જે મજબૂત કોંક્રિટને વીંધીને ઇમારતની અંદર વિસ્ફોટ કરે છે.

ડ્રોન સેન્ટર પર નિશાન: આ ઇમારત પાકિસ્તાનના ડ્રોન ઓપરેશનનું મુખ્ય કેન્દ્ર હતી, જેનો હવે સફાયો થઈ ગયો છે.

અંડરગ્રાઉન્ડ ફેસિલિટી: એરબેઝના ભૂગર્ભ સંગ્રહસ્થાનના પ્રવેશદ્વાર પાસે પણ મોટો ખાડો (ક્રેટર) જોવા મળ્યો છે, જે દર્શાવે છે કે ભારતે ડ્રોન અને સ્પેશિયલ ઇક્વિપમેન્ટ સ્ટોરેજને પણ નિશાન બનાવ્યું હતું.

ભારતની વધતી તાકાત
આ ઘટના ભારતની 'પિન-પોઈન્ટ એક્યુરસી' એટલે કે ચોકસાઈપૂર્વક હુમલો કરવાની ક્ષમતા સાબિત કરે છે. હુમલાના 10 મહિના બાદ પણ પાકિસ્તાન આ એરબેઝને ફરીથી કાર્યરત કરી શક્યું નથી, જે તેની આર્થિક અને તકનીકી લાચારી પણ છતી કરે છે. અત્યારે આ વિસ્તારમાં પાકિસ્તાની સેનાની ગતિવિધિઓ પર ભારતીય એજન્સીઓ સતત નજર રાખી રહી છે.