ગુજરાત રાજ્યમાં આરોગ્ય સેવાઓને વધુ સુદૃઢ અને આધુનિક બનાવવા માટે રાજ્ય સરકારે મહત્વપૂર્ણ પગલું ભર્યું છે. રૂ. 178.54 કરોડના ખર્ચે રાજ્યભરમાં 14 અદ્યતન અને નવીન MRI મશીનોની ખરીદી કરવામાં આવી છે. આ તમામ MRI મશીનો 1.5 ટેસ્લા ટેકનોલોજીથી સજ્જ છે, જે ઉચ્ચ ગુણવત્તાનું અને વધુ સચોટ નિદાન આપવા માટે જાણીતી છે. એક MRI મશીનની અંદાજિત કિંમત રૂ. 12.75 કરોડ નક્કી કરવામાં આવી છે.

આ નવીન MRI મશીનો GMERS અને સિવિલ હોસ્પિટલોમાં સ્થાપિત કરવામાં આવશે, જેથી સામાન્ય જનતાને સીધી રીતે લાભ મળી શકે. આ મશીનો રાજ્યના ધારપુર, વડનગર, વલસાડ, જુનાગઢ, નવસારી, રાજપીપળા, ગોધરા, પોરબંદર, મોરબી, અમદાવાદ, સુરત, વડોદરા, જામનગર અને વિસનગર ખાતે ઉપલબ્ધ થશે. પરિણામે રાજ્યના વિવિધ વિસ્તારોના દર્દીઓને MRI જેવી મહત્વપૂર્ણ તપાસ માટે હવે મોટા શહેરો સુધી દોડધામ કરવી નહીં પડે.

1.5 ટેસ્લા MRI ટેકનોલોજીથી ઝડપી, સચોટ અને ગુણવત્તાયુક્ત રિપોર્ટ મળી શકે છે. ખાસ કરીને મગજ, સ્પાઇન, હૃદય, સાંધા તથા આંતરિક અંગોની તપાસમાં આ ટેકનોલોજી ખૂબ જ ઉપયોગી સાબિત થાય છે. નવી મશીનો કાર્યરત થતાં હોસ્પિટલોમાં તપાસ માટેની લાંબી રાહ ઓછી થશે અને દર્દીઓને સમયસર સારવાર મળી શકશે.

રાજ્ય સરકારના આ નિર્ણયથી ખાનગી હોસ્પિટલોમાં ઊંચી ફી ચૂકવવાની મજબૂરીમાંથી દર્દીઓને રાહત મળશે. ઓછી કિંમતમાં અને સરકારી હોસ્પિટલમાં MRI તપાસ ઉપલબ્ધ થતાં ગરીબ અને મધ્યમ વર્ગના દર્દીઓને વિશેષ લાભ મળશે. આરોગ્ય સુવિધાઓને સસ્તી, સુલભ અને ગુણવત્તાયુક્ત બનાવવાની દિશામાં આ પગલું મહત્વપૂર્ણ માનવામાં આવી રહ્યું છે.

આ રીતે આધુનિક ટેકનોલોજીથી સજ્જ MRI મશીનોની સ્થાપનાથી ગુજરાતની જનતાને વધુ સારો આરોગ્ય લાભ મળશે અને રાજ્યની જાહેર આરોગ્ય વ્યવસ્થામાં નોંધપાત્ર સુધારો થવાની અપેક્ષા છે.