આજે જમ્મુ અને કાશ્મીરના ડોડામાં એક સૈન્ય વાહન રસ્તા પરથી લપસીને 200 ફૂટ ઊંડી ખીણમાં પડી ગયું હતું. જેમાં 10 જવાનો શહીદ થઈ ગયા છે અને સાત જવાન ઘાયલ થયા છે. જેઓને સારવાર માટે હોસ્પિટલ ખસેડાયા છે.

અકસ્માતની વિગતો જાહેર કરતા, સૈન્ય અધિકારીઓએ જણાવ્યું હતું કે 17 સૈનિકોને લઈને એક લશ્કરી વાહન ઊંચાઈવાળી ચોકી તરફ જઈ રહ્યું હતું ત્યારે બુલેટપ્રૂફ વાહન રસ્તા પરથી લપસી ગયું અને ડોડામાં ભાદરવાહ-ચંબા આંતરરાજ્ય માર્ગ પર ખાની ટોપ નજીક 200 ફૂટ ઊંડી ખાડીમાં પડી ગયું. આ અકસ્માતમાં દસ સૈનિકો શહીદ થયા છે, જ્યારે અન્ય ગંભીર રીતે ઘાયલ થયાછે.

અકસ્માતની માહિતી મળતાં, સંયુક્ત સૈન્ય અને પોલીસ ટીમે તાત્કાલિક બચાવ કામગીરી શરૂ કરી હતી. સ્થાનિક લોકો પણ પોલીસ અને બચાવ ટીમોને મદદ કરવા દોડી ગયા હતા. 10 સૈનિકોના મૃતદેહ બહાર કાઢવામાં આવ્યા હતા. ઘાયલ સૈનિકોને બહાર કાઢવામાં આવ્યા હતા, જેમાંથી ઘણાની હાલત ગંભીર હોવાનું જાણવા મળે છે. ત્રણેયને હેલિકોપ્ટર દ્વારા ઉધમપુરની કમાન્ડ હોસ્પિટલમાં લઈ જવામાં આવ્યા હતા, જ્યાં તેમને વિશેષ સારવાર મળી રહી છે.

સેનાએ એક નિવેદન જારી કરીને જણાવ્યું હતું કે અકસ્માતની તપાસ શરૂ કરવામાં આવી છે અને ઘાયલ સૈનિકોને શ્રેષ્ઠ શક્ય સારવાર આપવામાં આવી રહી છે. અકસ્માતમાં જીવ ગુમાવનારા સૈનિકોના પરિવારોને જાણ કરવામાં આવી છે.