મહારાષ્ટ્રની રાજધાની મુંબઈમાં ગત રાત્રે એક મોટો માર્ગ અકસ્માત થયો હતો. બેસ્ટ બસના ડ્રાઈવરે બસ રિવર્સ લેતી વખતે અનેક લોકોને કચડ્યા હતા. જેમાં ચાર લોકોના ઘટનાસ્થળે જ મોત અને દસ લોકો ગંભીર રીતે ઘાયલ થયા હતા. આ અકસ્માત ભાંડુપ વેસ્ટ સ્ટેશન રોડ વિસ્તારમાં થયો હતો. માહિતી મળતાં જ પોલીસ અને ફાયર બ્રિગેડની ટીમો તાત્કાલિક ઘટનાસ્થળે પહોંચી  બચાવ કામગીરી શરૂ કરી હતી. ટીમે ઘાયલોને હોસ્પિટલમાં દાખલ કર્યા હતા. અકસ્માત બાદ ભાંડુપ વેસ્ટ સ્ટેશન રોડ વિસ્તારમાં અંધાધૂંધી ફેલાઈ ગઈ હતી. લોકોને કાબુમાં લેવા માટે પોલીસને ભારે સંઘર્ષ કરવો પડ્યો હતો.

અહેવાલો અનુસાર, બસ રિવર્સ લેતી વખતે મુસાફરો સાથે અથડાઈ હતી, જેના કારણે ભાંડુપ વેસ્ટ સ્ટેશન રોડ કેમ્પસમાં ગભરાટ ફેલાયો હતો. પોલીસને રાત્રે 10:05 વાગ્યે ઘટનાની જાણ કરવામાં આવી હતી. મુંબઈ ફાયર બ્રિગેડ, પોલીસ, બેસ્ટ કર્મચારીઓ અને 108 એમ્બ્યુલન્સને ઘટનાસ્થળે મોકલવામાં આવી હતી. ઘાયલોને સારવાર માટે નજીકની હોસ્પિટલમાં દાખલ કરવામાં આવ્યા હતા. 

અકસ્માત સમયે, ઘણા લોકો કામ પરથી ઘરે પરત ફરી રહ્યા હતા, જેના કારણે સ્ટેશન કોમ્પ્લેક્સ ખૂબ જ ભીડથી ભર્યું હતું. માહિતી અનુસાર, ઘાયલો અને મૃતકોને રાજાવાડી હોસ્પિટલ અને એમ.ટી. અગ્રવાલ હોસ્પિટલમાં દાખલ કરવામાં આવ્યા હતા. એક અજાણી 31 વર્ષીય મહિલાને રાજાવાડી બીએમસી હોસ્પિટલમાં મૃત હાલતમાં લાવવામાં આવી હતી. પ્રશાંત લાડ (ઉં.વ.51)ની હાલત ગંભીર હોવાનું કહેવાય છે. વધુમાં, એમ.ટી. અગ્રવાલ હોસ્પિટલમાં ત્રણ લોકોને મૃત જાહેર કરવામાં આવ્યા હતા. અન્ય નવ ઘાયલ છે અને તેમની સારવાર ચાલી રહી છે.

એક વર્ષ પહેલા, ડિસેમ્બર 2024માં, મુંબઈના કુર્લામાં એક બેસ્ટ બસે આવી જ દુર્ઘટના સર્જી હતી. બસે આશરે 30 લોકોને કચડી નાખ્યા હતા, જેમાં ચાર લોકોના મોત થયા હતા અને 26 લોકો ઘાયલ થયા હતા. આ અકસ્માત કુર્લા વેસ્ટ રેલ્વે સ્ટેશન રોડ પર આંબેડકર નગરમાં થયો હતો. બેસ્ટ બસ કુર્લા સ્ટેશનથી અંધેરી જઈ રહી હતી ત્યારે તેની બ્રેક ફેલ થઈ ગઈ હતી અને ડ્રાઈવરે કાબુ ગુમાવ્યો હતો. ડ્રાઈવર ગભરાઈ ગયો હતો અને બ્રેક લગાવવાને બદલે એક્સિલરેટર દબાવ્યું હતું, જેના કારણે બસ બેકાબુ બની હતી. કાબુ ન મેળવી શકવાને કારણે બસ 30 લોકો પર ચડી ગઈ હતી. અકસ્માતમાં ચાર લોકોના મોત થયા હતા.