ગોવા પોલીસે મંગળવારે "બિર્ચ બાય રોમિયો લેન" નાઈટક્લબના ચાર માલિકોમાંથી એક અજય ગુપ્તાની અટકાયત કરી કાર્યવાહી શરુ કરી છે. નાઈટક્લબમાં લાગેલી ભીષણ આગમાં પચીસ લોકોના મોત થયા હતા. રાજ્ય પોલીસે અજય ગુપ્તા અને અન્ય માલિક સુરિન્દર કુમાર ખોસલા વિરુદ્ધ લુકઆઉટ સર્ક્યુલરજારી કર્યો હતો.ગોવા પોલીસના પ્રવક્તાએ જણાવ્યું હતું કે, અમે નાઈટક્લબના માલિકોમાંથી એક અજય ગુપ્તાની અટકાયત કરી છે. તે આ કેસમાં ધરપકડ કરાયેલ છઠ્ઠો વ્યક્તિ છે.તેમણે કહ્યું કે અગાઉ, પોલીસ ટીમ તેમને તેમના દિલ્હીના નિવાસસ્થાને શોધી ન શકી હોવાથી તેમના વિરુદ્ધ લુકઆઉટ સર્ક્યુલર જારી કરવામાં આવી હતી. તેમણે કહ્યું કે અજય ગુપ્તા બાદમાં દિલ્હીમાં મળી આવ્યા હતા અને તેમને કસ્ટડીમાં લેવામાં આવ્યા હતા. બે અન્ય નાઈટક્લબ માલિકો - સૌરભ લુથરા અને ગૌરવ લુથરા - ફરાર છે અને તેમના વિરુદ્ધ બ્લુ કોર્નર નોટિસ જારી કરવામાં આવી છે.

માલિકો પર સલામતીના ધોરણોનું ઉલ્લંઘન કરવાનો આરોપ

ગોવા નાઇટક્લબ આગમાં માર્યા ગયેલા લોકોમાં પશ્ચિમ બંગાળના રહેવાસી સુભાષ છેત્રીના પરિવારે મંગળવારે ક્લબના અધિકારીઓને તેમના મૃત્યુ માટે જવાબદાર ઠેરવ્યા, આરોપ લગાવ્યો કે તેઓએ મૂળભૂત સલામતીના ધોરણોનું ઉલ્લંઘન કર્યું. શનિવારે રાત્રે ઉત્તર ગોવાના આર્પોરામાં બિર્ચ બાય રોમિયો લેનમાં લાગેલી ભીષણ આગમાં પચીસ લોકોનાં મોત થયાં. છેત્રી બે વર્ષ પહેલાં તાલીમાર્થી રસોઇયા તરીકે કામ કરવા માટે ગોવા ગયા હતા અને અકસ્માત થયો ત્યારે રસોડામાં હતા.

જવાબદાર લોકો સામે કડક કાર્યવાહીની માંગ

છેત્રી પરિવારે નિષ્પક્ષ તપાસ અને જવાબદારો સામે કડક કાર્યવાહીની માંગ કરી. સુભાષની બહેન ઉર્મિલાએ કહ્યું, "જ્યારે મને ખબર પડી કે મારા ભાઈનું નામ મૃતકોની યાદીમાં છે, ત્યારે મને ખબર નહોતી કે મારા માતાપિતાને આ સમાચાર કેવી રીતે આપું. તેણીએ સિલિગુડી નજીક બાગડોગરા સ્થિત તેના નિવાસસ્થાને પત્રકારોને જણાવ્યું કે સુભાષ પરિવારનો એકમાત્ર કમાનાર હતો. સુભાષના કાકા દિલીપ છેત્રીએ કહ્યું, "ઘટનાની નિષ્પક્ષ તપાસ થવી જોઈએ. અમારું માનવું છે કે મૂળભૂત અગ્નિ સલામતી ધોરણોનું પાલન કરવામાં આવ્યું ન હતું. અમે ક્લબના અધિકારીઓ સામે કડક કાર્યવાહી ઇચ્છીએ છીએ."